Gwamna Soludo ya taya al’ummar Anambra murnar Kirsimeti

Gwamnan Jihar Anambra, Chukwuma Soludo, ya aike da sakon taya murna ga al’ummar Jihar Anambra da dukkan ’yan Najeriya a yayin bikin Kirsimeti na 2024.

A cikin wata sanarwa da Sakataren Yada Labaransa, Christian Aburime, ya fitar ranar Talata, Gwamna Soludo ya bayyana cewa wannan lokaci na musamman yana tunatar da mutane game da ƙaunar Allah mara iyaka da kuma fata mai ɗorewa da haihuwar Yesu Almasihu ta kawo ga ɗan Adam.

Sanarwar ta ce: “Wannan lokaci na Kirsimeti na ƙarfafa mutane su nuna ƙauna mara iyaka ga junansu da kuma cigaba da kasancewa da fata duk da ƙalubale da ake fuskanta.”

“Hakazalika, gwamnan ya tabbatar wa da al’ummar Anambra waɗanda suka dawo gida domin bikin wannan lokaci cewa an ɗauki matakan tsaro na musamman domin tabbatar da cewa sun gudanar da bikin lafiya tare da iyalansu.

“Hanyoyin mota a faɗin jihar sun samu gyare-gyare sosai tare da inganta tsarin sarrafa zirga-zirga domin sauƙaƙa tafiye-tafiye a wannan lokaci da bayan sa. Don haka, Gwamna Soludo yana fatan kowa zai yi Kirsimeti mai cike da farin ciki, zaman lafiya, da arziki.”

Gwamna Soludo ya taya al’ummar Anambra murnar Kirsimeti