Gwamnatin Sokoto zata binciki harin da jirgin yaki ya kai wasu kauyuka

Gwamnan jihar Sokoto, Ahmad Aliyu, ya ce gwamnatinsa za ta gudanar da bincike kan abin da ya janyo harin kuskure na jiragen saman sojin ƙasar wanda ya kashe farar-hula 10 tare da kashe dabbobi a ƙauyukan Gidan Bisa da Runtuwa da ke ƙaramar hukumar Silame.

Wata sanarwa da Sakataren Watsa Labarai na jihar Sokoto, Abubakar Bawa, ya fitar ta ambato gwamnan yana bayyana lamarin a matsayin “abin takaici.”

Rahotanni dai sun ce an tafka kuskuren ne yayin da dakarun ƙasar nan ke ƙoƙarin fatattakar Lakurawa ‘yan ta’adda a jihar.

Gwamnatin Sokoton tace za ta bai wa ‘yan’uwan waɗanda lamarin ya rutsa da su kyautar naira miliyan 20 da kuma buhu hatsi 100 tare da biya kuɗin kulawa da waɗanda suka ji rauni a harin a asibiti.

Wannan ba shi ba ne karon farko da aka samu irin wannan harin da soji suka afka wa farar-hula bisa kuskure a Nijeriya ba.

Ko a ranar uku ga watan Disamban bara (2023) ma, an kai harin jirgi mara matuki a wani taron Maulidi da ake a ƙauyen Tudun Biri da ke jihar Kaduna inda aka kashe kimanin mutum 88.

Gwamnatin Sokoto zata binciki harin da jirgin yaki ya kai wasu kauyuka