Gwamnatin tarayya za ta kashe Naira Biliyan 100 kan ciyar da dalibai a Makarantu

Gwamnatin Tarayya ta shirya kashe naira biliyan 100 domin gudanar da shirin ciyar da dalibai a makarantu (NHGSFP) a shekarar 2025.

Bincike kan kasafin kudin 2025 ya nuna cewa shirin yana karkashin Service Wide Vote (SVW) kuma an sanya shi a ma’aikatar kasafi da tsare-tsaren tattalin arziki.

A baya, an dakatar da shirin a ranar 12 ga watan Janairu, bayan dakatarwar da aka yi wa Babbar Daraktar Hukumar NSIPA, Halima Shehu, kan zargin almundahana ta kudi. Sai dai Ministan Kudi Wale Edun, ya bayyana a watan Agusta cewa gwamnati tana shirin farfado da shirin nan bada jimawa ba.

Edun ya bayyana cewa gwamnati za ta samar da isassun kudade domin tallafawa da dorewar shirye-shiryen ilimi a fadin kasa. Ya ce shirin ciyar da dalibai a makarantu ba wai kawai zai inganta lafiyarsu da jin dadinsu ba, har ma zai taimaka wajen rage yawan yaran da ke barin makaranta.

Gwamnatin tarayya za ta kashe Naira Biliyan 100 kan ciyar da dalibai a Makarantu