Kwalejin Nuhu Bamalli ta yabawa Gwamna Sani kan karin shekarun ritaya

Hukumar gudanarwa ta Kwalejin Kimiyya da Fasaha ta Nuhu Bamalli, Zariya, ta yabawa Gwamnan Jihar Kaduna, Uba Sani, bisa shawarar da ya yanke na ƙara wa’adin ritayar ma’aikatan ilimi daga shekara 60 zuwa 65.

Shugaban makarantar, Dakta Mohammed Abdullahi, ya bayyana jin daɗinsa, inda ya kwatanta matakin gwamnan a matsayin cigaban da ya dace da tsare-tsaren ilimi na ƙasa tare da ƙarfafa ci gaban ƙwarewar ɗan Adam.

Sabuwar dokar da gwamnan ya sanya wa hannu ranar Alhamis da ta gabata ta tabbatar da ƙarin shekarun ritaya ga ma’aikatan ilimi a wasu manyan makarantun jihar, matukar sun cika sharuɗɗan da ka’idojin da aka gindaya.

A cewar Dakta Abdullahi, shawarar ta biyo bayan tattaunawa mai ma’ana tsakanin gwamnan da ƙungiyoyin ma’aikata na manyan makarantun da abin ya shafa.

“Muna matuƙar godiya ga Gwamna Uba Sani bisa ƙarin shekarun ritayar ma’aikatan ilimi,” in ji Abdullahi a cikin wata sanarwa da Sakataren Bayanan Yada Labarai na kwalejin, Abdullahi Ibrahim Shehu, ya fitar ranar Lahadi.

Ya ƙara da cewa, “Wannan mataki yana nuni da jajircewar gwamnan wajen inganta jin daɗin ma’aikatanmu da kuma cigaban ilimi a jihar.

“Muna yabawa wannan matakin wanda tabbas zai inganta ingancin ilimi a makarantar mu.”

Kwalejin Nuhu Bamalli ta yabawa Gwamna Sani kan karin shekarun ritaya