Kwara: Gwamna Abdulrazaq yayi jimamin rasuwar tsohon kwamishina, Adisa

Gwamnan Jihar Kwara, Abdulrahman Abdulrazaq, ya aika da sakon ta’aziyyarsa ga iyalan tsohon Manajan Darakta na jaridar The Herald kuma Kwamishinan Labarai da Sadarwa, Alhaji Abdulrahim Adisa.

Jaridar DAILY POST Hausa ta ruwaito cewa Adisa, wanda ya taba rike mukamin Shugaban Karamar Hukumar Moro, ya rasu a safiyar Alhamis yana da shekaru 91, kamar yadda sakataren watsa labarai na gwamna, Rafiu Ajakaye, ya bayyana a cikin wata sanarwa a Ilorin.

Gwamna Abdulrazaq ya bayyana marigayi Adisa a matsayin gogaggen ma’aikacin kafar yada labarai da ya bayar da gudunmawa mai tarin yawa, musamman lokacin da yake aiki a Kamfanin Dillancin Labarai na Najeriya (NAN).

A cikin kalamansa, Gwamnan ya ce:
“Adisa ya kasance babban jigo a fannin aikin jarida da kafar yada labarai a jiharmu da ma kasa baki daya. Mun yi babban rashi, kuma muna yi wa danginsa da duk wanda yayi aiki tare da shi ta’aziyya.”

Ya kuma yi addu’ar Allah ya gafarta wa marigayi Adisa, ya sa shi cikin Al-jannah Firdaus, tare da baiwa iyalansa hakurin jure rashin.

Kwara: Gwamna Abdulrazaq yayi jimamin rasuwar tsohon kwamishina, Adisa