4 hours ago
2
Dakarun runduna ta shida ta sojojin Najeriya tare da hadin gwiwar wasu hukumomin tsaro ta haifar da nasarar da aka samu wajen yaki da masu satar mai a yankin Niger Delta.
A wata sanarwa da Mataimakin Daraktan Hulda da Jama’a na Rundunar ta 6, Laftanar Kanar Danjuma Jonah Danjuma, ya fitar, ya bayyana cewa dakarun sun rusa wuraren tace mai ba bisa ka’ida ba guda 37, sun kwace jiragen ruwa guda shida, sun kama masu satar mai guda goma, tare da kwato fiye da lita 130,000 na man da aka sata.
Sanarwar ta ce a Jihar Ribas, dakarun sun lalata wani tarin wuraren tace mai guda tara a Obiafu, cikin karamar hukumar Ogba/Egbema/Ndoni (ONELGA), inda suka gano ganguna 176 da kayayyakin da ake amfani da su wajen tace mai. Haka kuma, an kwace lita fiye da 60,000 na kayayyakin da aka sata, wayoyin hannu guda biyu da sauran kayan aiki.
A yayin samamen, an kwato lita fiye da 50,000 na danyen mai, lita 5,000 na man gas (AGO) da aka tace ba bisa ka’ida ba, da kuma lita 6,250 na kananzir (DPK). Hudu daga cikin wadanda ake zargi da satar man an kama su a yayin samamen.
A yankin Buguma a karamar hukumar Asari-Toru, dakarun sun rusa wuraren tace mai guda uku tare da lalata wani babban jirgi dauke da lita fiye da 24,000 na man da aka sata. Haka zalika, a yankunan Bille da Bakana na karamar hukumar Degema, an gano wuraren tace mai guda uku, an kuma kama jiragen ruwa guda biyu da aka kera da itace, inda aka kwato fiye da lita 11,000 na mai.
Sanarwar ta nuna cewa Sojojin za su ci gaba da yin aiki tare da sauran hukumomin tsaro wajen tabbatar da tsaro da kare albarkatun kasa.
Sojoji sun lalata wuraren tace mai 37, sun kama barayin mai 10 a Yankin Niger Delta
.png)
English (US) ·