Alkali ya tura wadanda su ka shirya taron Ibadan zuwa gidan yari

Wata Kotun Majistare a Ibadan, ta tura tsohuwar matar Ooni na Ife, Naomi Silekunola da Shugaban gidan radiyon Agidigbo FM, Oriyomi Hamzat; da shugaban Makarantar Islamiyya ta High School, Abdullahi Fasasi, a gidan yarin Agodi.

Umarnin sanya su a kurkuku ya biyo bayan tuhumarsu a dangane da hatsarin tuerereniya da ya faru a taron nishadi na Kirsimeti da aka shirya a Makarantar Islamiyya ta High School, Bashorun, Ibadan, wanda yayi sanadiyyar rayukan yara 35 da kuma jikkatar wasu 6.

Kotun, wadda Mai Shari’a Olabisi Ogunkanmi ta jagoranta, ta bayar da wannan umurni ne bayan da aka kawo wadanda ake zargin kotu cikin tsauraran matakan tsaro.

Wadanda ake tuhuma suna fuskantar tuhumar laifuka guda hudu. A cewar mai gabatar da kara na ‘yan sanda, laifukan sun saba da Sashe na 324 na Kundin Penal, Cap. 38, Vol. II, Dokokin Jihar Oyo, 2000.

An zarge su da taka rawa a cikin abubuwan da suka kai ga afkuwar turereniyar.

Mai Shari’a Ogunkanmi ta umarci a sanya wadanda ake zargin a gidan yarin Agodi har sai an samu shawarar Daraktan Shari’a na Jihar Oyo.

Alkali ya tura wadanda su ka shirya taron Ibadan zuwa gidan yari